ازاي عملت تقريبًا نص مليون جنيه في آخر سنتين من حياتي وأنا 17 سنة، ومش من التداول.
ومع إنّي مبحبش أستخدم النوع ده من الهوكات، بس خليني أقولك ليه.
أنا مبحبش أبدأ بالطريقة دي لسببين.
الأول، إن مش معنى إن أنا عملت رقم معين يبقى انت هتعمله في نفس المدة،
ممكن تعمل أكتر، ممكن تعمل أقل، الموضوع مختلف جدًا من شخص للتاني.
والتاني، إن ممكن تفتكر إن الفلوس دي جاتلي مرة واحدة، وده غلط.
يعني أنا ممسكتش فجأة النص مليون جنيه.
الفلوس دي زي ما قلتلك جت على مدار سنتين، فطبيعي إنها اتصرفت في حاجات زي أجهزة كويسة، موبايل، لابتوب، أو أي حاجة كنت محتاجها.
بس النتيجة إنك بتعيش حياة كويسة، والحاجة اللي بتحتاجها بتقدر تجيبها من مجهودك.
ومع ذلك، الموضوع فعلًا حقيقي.
وانت تقدر تعمله زي ما أنا عملت، وزي ما ناس كتير عملوا نفس الشيء ووصلوا لنتايج مشابهة.
الفرق بين السبوبه ومصدر الدخل الثابت
طيب، إيه اللي أنا عملته عشان أوصل لرقم زي ده؟
قبل أي حاجة، لازم تعرف الفرق بين “السبوبة” وبين إنك تتعلم حاجة تخليك عندك مصدر دخل ثابت يخليك تعرف تجيب فلوس طول حياتك وانت متطمن.
السبوبة باختصار هي حاجة بتخليك تجيب فلوس فجأة، بس مش مستمرة معاك.
غالبًا بتكون فلوس بتجيلك من غير ما تبذل مجهود في تقديم أو تعلم الحاجة اللي خدت مقابلها فلوس.
زي مثلًا لما انتشرت مؤخرًا في مصر منصات المراهنات اللي بتخليك تحط فلوس،
وفي نسبة كبيرة الفلوس دي بتتضاعف.
آه، ناس كتير جدًا كسبت منها في البداية،
بس لو بصيت دلوقتي هتلاقيهم فين؟
حرفيًا اللي نجا منهم وطلع بأقل الخسائر مبقاش معاه فلوس،
وطبعًا الأغلبية بقى عليهم ديون طائلة دمرت حياتهم.
الناس دي خسرت ليه؟
عشان راحوا للطريق السهل.
طريق بيخليك مدمن،
وبيخلي أصحاب المنصات يعرفوا يسيطروا عليك ويوصلوك لمرحلة ممكن تسرق أو تعمل أي حاجة بس عشان تجيب فلوس تراهن بيها تاني.
الطرق السريعة للربح وازاي تعرف إنك ماشي غلط
طبعًا ده مجرد مثال بسيط جدًا.
في طرق تانية كتير للربح السريع،
زي الناس اللي بتقولك “هعلمك تداول،
بمجرد ما تبعتلي جنيه، هبعتهولك ٢ جنيه”.
انت من قبل ما تدخل المجال ده بيكون اتنصب عليك فعلًا.
وعشان أختصر عليك من غير ما أشرح كل المجالات دي،
عايزك تعرف إزاي لوحدك تكتشف إنك ماشي في طريق غلط.
هتلاقي نفسك بتكسب فلوس وانت مش متعلم حاجة.
فلوس جتلك بطريقة عبثية كده من غير مجهود حقيقي أو مهارة.
وده بالضبط الطريق اللي مش عايزك تمشي فيه.
مش عايزك تكون بتكسب فلوس من غير تعب أو تطوير في نفسك،
لأنك كده مش بتبني حاجة ثابتة.
الطريق المضمون: تعلم المهارات
وده هيودينا للطريق التاني — الطريق الثابت، المضمون، المستقر.
اللي مش هيحتاج منك رأس مال،
وحرفيًا ممكن تبني منه حياة كاملة،
وتبقى مطمن إنك مش هتخسر فلوسك.
وهو تعلم المهارات.
تعلم المهارات مش هو الطريق السهل،
بس هو الطريق اللي فعلًا هيغير حياتك.
هيحتاج وقت ومجهود كبير،
بس في المقابل هتكتسب حاجة تفضل معاك طول عمرك.
يعني إيه تتعلم مهارة فعلًا؟
أنا اتكلمت قبل كده كتير عن فكرة “تعلم المهارات”،
بس المرة دي عايز أشرح إزاي فعلًا بتغير حياتك وقد إيه هي حاجة مضمونة.
فسريعًا كده، يعني إيه “اتعلم مهارة”؟
خليني أتكلم عن مجالات زي الماركتينج أو البرمجة.
لو بصيت على مجال الماركتينج، هتلاقي جواه مجالات فرعية زي:
الميديا باينج، تحسين محركات البحث (SEO)،
المونتاج والجرافيك ديزاين، وتطوير المواقع.
تطوير المواقع مثلًا يعتبر تابع للبرمجة،
بس مرتبط جدًا بالماركتينج وبنجاح أي شركة حاليًا.
وفي مجالات تانية كتير هتلاقيها مكتوبة في الوصف تحت،
مرتبة من أعلى مهارة ممكن تجيب فلوس،
لأقل مهارة من ناحية الدخل، بالتفصيل.
وابحث عنهم بنفسك لو حابب تتعمق أكتر في كل واحدة.
كل مجال من دول هو مهارة.
وعشان تدخل أي مجال، لازم تتعلم مهارة من دول.
مهارات الماركتينج تحديدًا تعتبر High Income Skills،
يعني مهارات بتجيب فلوس كتير جدًا.
متطلبات تعلم أي مهارة
طيب باختصار، عشان تتعلم مهارة من دول هتحتاج إيه؟
أول حاجة، لازم تعرف إنك مش محتاج رأس مال.
وبرضو مش محتاج واسطة عشان تدخل المجال.
آه، العلاقات في المجال ده كويسة وبتسهل كتير بعدين،
بس الحاجات دي بتيجي مع الوقت مش في البداية.
وبرضو السن مش مشكلة هنا.
طول ما انت ناضج وبتفكر كويس ووصلت للنقطة دي،
فانت تقدر تبدأ.
أنا نفسي اشتغلت وأنا عندي 15 سنة،
في وظيفة كمان،
وقبلها وبعدها اشتغلت فريلانس ولحد دلوقتي.
طب لو معنديش فلوس أبدأ إزاي؟
سؤال مهم جدًا.
لو انت صفر، مش معاك ولا جنيه،
تعمل إيه وتجيب لابتوب ازاي؟
الموضوع ملوش حل غير إنك تشتغل شغلانة مؤقتة.
في سوبر ماركت مثلًا، ديليفري، أو أي حاجة بسيطة.
وتجمع منها فلوس.
أي حد عايز ينجح لازم يشتغل في حاجة من النوع ده في البداية،
مفيهاش أي مشكلة،
بس الأهم متتسحلش فيها.
خلي هدفك إنك شغال مؤقتًا لحد ما تجيب لابتوب،
أو لحد ما تبدأ تتعلم مهارة وتكسب منها فلوس.
بس ما تخليش الشغل ده يسرقك من الهدف الأصلي.
أول خطوة بعد ما تجيب لابتوب
بمجرد ما تجيب لابتوب،
يبقى انت كده رسميًا بدأت.
هتبدأ تسيرش أكتر عن المهارات وتشوف أنهي واحدة مناسبة ليك.
أنا عن نفسي بدأت أتعلم Web Development،
وعملت فيديو كامل “رودماب” بتكلم فيه عن ازاي تتعلمه خطوة بخطوة،
تقدر تشوفه من هنا:
ولو لقيت إنك حابب مجال تاني أكتر،
مفيش مشكلة.
ابحث عنه وابدأ تتعلمه.
بس نقطة مهمة جدًا: خليك متوازن بين اللي بتحبه واللي بيجيب فلوس.
مينفعش عشان بتحب حاجة غريبة زي مثلًا “تأكيل الضفادع”
تتعلمها كمهارة لأن مفيش سوق ليها.
وبرضو مينفعش تتعلم البرمجة لمجرد إنها بتدخل فلوس كتير
وانت أصلاً مش طايق المجال.
شوف حاجة بتحبها لحد ما،
وفي نفس الوقت تقدر تعيش منها.
ازاي تتعلم مهارة
عشان تتعلم أي مهارة من دول، في شوية حاجات لازم تفهمها،
زي إزاي تعرف أكتر من مهارة في نفس الوقت من غير ما تضيع تركيزك،
وازاي ترتب أولوياتك.
أنا شرحت النقطة دي بالتفصيل في فيديو تاني،
تقدر تشوفه هنا:
الخطوات العملية لتعلم المهارات
الخلاصة
في الأول وفي الآخر،
الموضوع كله توفيق من ربنا ومجهود منك.
ابدأ، حط مجهود، واسعى إنك تحسن حياتك.
وربنا عمره ما بيضيع تعب حد.
بالتوفيق.
